Младински културен центар – Битола (МКЦ – Битола) е овластено здружение за давање на претходна правна помош од 2011 година и во континуитет до денес обезбедува правна помош за граѓаните, а особено за сиромашните и други ранливи категории на граѓани.
Редовното функционирање на канцеларијата при МКЦ – Битола и во 2018 г. ќе овозможи граѓаните од Битола и поблиските рурални средини да се обраќаат за правна помош за добивање на неопходни информации и советодавни услуги поврзани со бесплатната правна помош и механизмите за олеснување на пристапот до правда.
Главната цел на проектот е да се придонесе за подобрување и надградување на системот за заштита на човековите права и олесни пристапот до правда за сиромашните граѓани и останатите ранливи категории на граѓани. Покрај основната активност за обезбедување на правна помош, предвидени се и активности за зајакнување на јавната свест на граѓаните со запознавање на нивните права и поттикнување на иницијативи за помасовно користење на алатката на бесплатна правна помош. За таа цел предвидени се четири едукативни сесии за правна едукација на граѓани.
Во текот на спроведувањето на проектот предвидена е правна помош во случај на одбиени барања за бесплатна правна помош а за одобрените барања за бесплатна правна помош предвидено е набљудување на судски случаи во кои се ангажирани адвокати. Преку непосредна комуникација со граѓаните кои се обраќаат за правна помош, теренските активности и телефонски контакти се спроведува Истражување за правните прашања и проблеми со кои најчесто се соочуваат граѓаните, можноста за ангажирање на стручно лице – адвокат и нивната доверба, став оцена кон правосудниот систем и управни органи.
Воспоставените контакти и соработката со други граѓански организации во оваа област и институции продолжува и оваа година со напори за нивно надоградување. За таа цел во февруари 2018 г. склучен е Меморандум за соработка помеѓу МКЦ –Битола и Меѓуопштински центар за социјална работа – Битола во делот на семејното насилство. Меморандумот опфаќа упатување на жртвите на семејно насилство за користење на претходната правна помош и правото на бесплатна правна помош.
Сознанието за своите права загарантирани со меѓународни и национални прописи треба да поттикне чувство на ОБВРСКА и ОДГОВОРНОСТ кај граѓаните на патот за остварување и заштита на правата. Проектот Пристап до правда во Македонија е финансиски поддржан од Фондација отворено општество – Македонија (ФООМ) за временскиот период од 01.01.2018 до 31.12.2018 година.
Граѓаните можат да се обраќаат секој работен ден од 09.00 до 16.00 часот во канцелариите на МКЦ – Битола или на email: mkcbt@t.mk
или на телефон 047 233 020.
Лице за контакт: Вера Гогу
Младински културен центар – Битола
